Gerir sig kláran til að synda frá Reyðarfirði til Eskifjarðar
Sundgarpurinn Sigurgeir Svanbergsson mun leggja í sjósund sitt til styrktar Píeta-samtökunum þennan morguninn en lagt verður í hann frá Gripöldu í Reyðarfirði og komið í land á Mjóeyrinni á Eskifirði.
Sigurgeir gerir ráð fyrir að sundið muni taka þetta tvær til fjórar klukkustundir eftir öldulagi og kuldaskilyrðum en hann er ekki bara að synda heldur og draga konu sína á kajak á eftir sér alla leiðina. Alls er þetta um sex kílómetra langt sund í heildina. Hópur fólks ætlar að taka vel mót Sigurgeir og Sóleyju þegar í land verður komið og allir hvattir til að koma á Mjóeyrina og vera með.
Sund hans nú er táknrænt eins og Austurfrétt fjallaði um fyrir skömmu en allt þetta gerir hann til styrktar Píeta-samtökunum og hægt verður að heita á hann meðan á sundinu stendur á vef samtakanna.
Sundinu sjálfu verður streymt að hluta til beint frá Sóleyju í kajaknum og reglulegar uppfærslur birtast líka á facebook-vefnum Sigurgeir syndir fyrir Píeta sem finna má hér. Hárnákvæm tímasetning á hvenær þau leggja í hann fer eftir veðri en einhvern tíma milli klukkan 10 til 12.
