Hitinn í 23 gráður á Hallormsstað
Hæsti hiti sem mælst hefur á landinu í dag var á Hallormsstað, 23°C. Austfirðingar og gestir þeirra hafa slakað á og notið veðurblíðunnar í vikunni.„Það er búið að vera mjög gott veður hér á Hallormsstað. Fólk er léttklætt í vinnu og á tjaldsvæðinu þar sem margir eru að sóla sig,“ segir Bergrún Arna Þorsteinsdóttir, aðstoðarskógarvörður á Hallormsstað.
„Það er rólegt yfir tjaldsvæðinu. Þegar það er 23 stiga hiti nýtur fólk þess að vera úti í blíðunni og slaka á.“
Austfirðingar fá loksins veðurblíðuna eftir fremur kaldan fyrri hluta júnímánaðar. Það á sinn þátt í því að tjaldsvæðið á Hallormsstað er aðeins hálft. En þangað hafa sólarunnendur lagt leið sína núna. „Það var nokkuð um að fólk kom í byrjun vikunnar til að vera hér alla sólardagana og síðan hefur verið að bætast í hópinn.“
Bæði í Möðrudal og Brú á Jökuldal fór hitinn upp í um 20 stig. Eilítið svalara hefur verið meðfram ströndinni. Á Egilsstöðum fór hitinn upp í 21,8° á hádegi. Þar naut fólk þess að vera úti í veðurblíðunni og panta sér kalda drykki.
Spáð er áframhaldandi suðvestan átt og um og yfir 20 stiga hita á morgun fimmtudag og föstudag.
