Kreppulausir Álfheimar
Ferðaþjónustan Álfheimar hefur ákveðið að ráðast í frekari uppbyggingu ferðaþjónustu á Borgarfirði eystra og segir kreppu stríð á hendur.
Arngrímur Viðar Ásgeirsson, framkvæmdastjóri Álfheima, segist trúa að Borgarfjörður eystri sé fyrir ferðamenn framtíðarinnar, enda í boði rómuð náttúrufegurð og góðir möguleikar til afþreyingar og þá sérstaklega fuglaskoðunar og gönguferða um hinar rómuðu Víknaslóðir, Loðmundarfjörð og Stórurð.
,,Markaðssetning á ferðum okkar síðastliðið ár þar sem gist er í herbergjum með baði hefur leitt það í ljós, m.a. með góðum árangri hjá erlendum söluaðilum, að þörf er fyrir nýsköpun og nýja áfangastaði í íslenskri ferðaþjónustu sem þjónar nýjum markhóp með áhuga á Íslandi og náttúru þess.”
Dvelji lengur
Arngrímur segir áherslu lagða á þjónusturíkar ferðir þar sem ferðamenn dvelja lengur en eina nótt og í skipulögðum ferðum upp í sex nætur. Það þýði að söluþörfin sé aðeins um 500 ferðamenn á ári sem gisti í 5-6 nætur, eða um 0,1 % ferðamanna er koma til Íslands í dag. ,,Því marki hyggjumst við ná árið 2010 og verðum þá vonandi búin að byggja eitt hús í viðbót þannig að við önnum þeim fjölda. Varan er sérstök; gönguferðir með áherslu á góða þjónustu og gildi ,,Eco”-túrisma sem byggir meðal annars á jákvæðri upplifun ferðamanna og jákvæðum áhrifum komu þeirra á samfélag, umhverfi og efnahag svæðisins sem heimsótt er. Meðal annars er áhersla á aðkomu heimamanna að leiðsögn, mat úr héraði og að kynnast hvað lítið samfélag er að fást við til sjávar og sveita.”
Meira byggt
Álfheimar hófust árið 2008 handa við byggingu bjálkahúss með tíu herbergjum með baði og nú á að bæta um betur og byggja 320 fermetra hús sem inniheldur 8 herbergi með baði, veitingaeldhús og veitingasal fyrir um 60 gesti. Í húsinu verða tvö herbergi fyrir fatlaða einstaklinga með góðu aðgengi. Samið var við H-gæði ehf. með aðsetur í Fellabæ um byggingu að fokheldi en G. Ármannsson hefur tekið að sér uppsteypu burðarvirkis fyrir húsið. Jóhann Sigurðarson sér um jarðvinnu, en samningar um frágang innanhúss og lagnir eru á lokastigi.
Arngrímur áætlar að um fjögur ársverk verði unnin við framkvæmdir vorsins og við Ferðaþjónustuna Álfheima muni starfa um tíu einstaklingar sumarið 2009, í sveitarfélagi sem telur um 150 íbúa.
