ME mætir Versló í kvöld
Lið Menntaskólans á Egilsstöðum mætir í kvöld Verzlunarskóla Íslands í annarri umferð spurningakeppni framhaldsskólanna, Gettu betur. Lið Verkmenntaskóla Austurlands komst áfram í aðra umferð sem eitt af stigahæstu tapliðunum.ME mætti Menntaskólanum á Ásbrú í fyrstu keppni ársins og vann hana, 20-9. ME á heldur lengri sögu í keppninni því skólinn á Ásbrú keppir nú í annað sinn, enda nýlega stofnaður.
Önnur umferðin hefst í kvöld og þar mætir ME Versló. Viðureignin er sú fyrsta á dagskrá, klukkan 19:00 og verður í beinni vefútsendingu. Sigurvegarinn vinnur sér sæti í sjónvarpshluta keppninnar.
VA tapaði fyrir Fjölbrautaskólanum við Ármúla. Þar hafði VA færi á að jafna með réttu svari í síðustu spurningu en giskaði rangt. FÁ fékk þar með svarréttinn, svaraði rétt og vann 25-21. VA komst hins vegar áfram sem eitt af þremur stigahæstu tapliðunum og mætir Fjölbrautaskólanum í Breiðholti á miðvikudagskvöld.
Í fyrstu útgáfu fréttarinnar var ranghermt að VA hefði fallið úr leik eftir tapið. Beðist er velvirðingar á mistökunum.
Lið ME. Katrína Edda Jónsdóttir, Heikir Hafliðason og Rafael Rökkvi Freysson. Mynd: ME
