Aprílgabb: Ringo Starr snýr aftur á upprisu Atlavíkurhátíðarinnar
Hópur áhugafólks hefur ákveðið að endurvekja verslunarmannahelgarhátíð í Atlavík. Bítillinn fyrrverandi Ringo Starr hefur þegar boðað komu sína og samningaviðræður standa yfir við fleiri stórstjörnur.„Þetta er eitthvað það stórkostlegasta sem gerst hefur frá landnámi Austurlands því þarna verður einstakt úrval stórmenna. Koma Una danska kemst ekki nema í hálfkvisti við þetta því hann komst ekki nema inn að Unalæk.“
Þetta segir Jónas Þór Jóhannsson sem fer fyrir hópnum. Jónas Þór er fyrrverandi framkvæmdastjóri UÍA sem um árabil stóð fyrir Atlavíkursamkomunum og síðar hátíð á Eiðum um verslunarmannahelgina.
Þegar hefur verið gengið frá samkomulagi við Bítilinn Ringo Starr um að koma fram á hátíðinni, en í ár eru 35 ár liðin frá því hann tók lagið í Atlavík með Stuðmönnum. „Þeir hafa haldið góðum tengslum og koma hans er að miklu leyti þeim að þakka,“ segir Jónas Þór.
Mick Jagger og Friðjón Jóhannsson
Að sjálfsögðu er búið að bóka Stuðmenn sjálfa sem og Skriðjökla, sem eftirminnilega sigruðu hljómsveitakeppni á Atlavíkurhátíð og Danshljómsveit Friðjóns Jóhannssonar. Þá mun John Lennon koma fram á hátíðinni í gegnum skoska tónlistarmanninn og miðilinn Angus Mikus.
Viðræður standa yfir við fleiri stórstjörnur. „Rolling Stones hafa tekið vel í að mæta, gegn því að Mick Jagger verði heill heilsu. Þarna stendur hreindýraveiðitímabilið sem hæst og Jagger og Starr hafa bókað veiði undir leiðsögn Sigurðar Aðalsteinssonar. Þeir hafa þegar fengið úthlutað leyfum,“ segir Jónas.
Til skoðunar er að hátíðin teygi anga sína víðar en um Atlavíkina, þannig eru hugmyndir uppi um að Ian Gillan taki nokkur lög úr Jesus Christ Superstar í sérstakri hátíðarmessu í Vallaneskirkju á sunnudeginum.
Utanríkisráðherra liðkaði fyrir
Jónas Þór segir að nokkurt verk hafi verið að safna saman þessum stórmennum en hópurinn hafi notið velvildar hvar sem hann hafi barið dyra.
„Lykilfyrirtæki í austfirsku atvinnulífi hafa tekið okkur vel og Skógræktin verið samþykk því að lána skóginn þessa helgi. Það var frekar erfitt að ná í suma listamennina því þeir láta ekki hvern sem er ná taki á sér, en við það nutum við sérstakrar hjálpar utanríkisráðherra og við viljum þakka honum sérstaklega fyrir. Það hafa ekki verið vandræði að fá stuðning.“
Frímiðar fyrir bestu Atlavíkursöguna
Miðasala á hátíðina hefst formlega 1. maí næstkomandi. Í samstarfi við Austurfrétt stendur áhugahópurinn fyrir samkeppni um bestu söguna frá Atlavíkurhátíðum fyrri tíma en tveir VIP miðar eru í aðalverðlaun.
Senda má söguna inn í athugasemdum við fréttina eða á netfangið This email address is being protected from spambots. You need JavaScript enabled to view it.. Skilafrestur er til miðnættis
