Róa kajak frá Grænlandi til Skotlands
Tveir enskir menn eru nú staddir á Austurlandi á leið sinni frá Grænlandi til Skotlands á kajak. Þeir Olly Hicks og George Bullard vilja með þessu ferðalagi sýna fram á að grænlenskur frumbyggi, sem kom að landi í Skotlandi á 17. öld hafi getað róið þangað alla leið á kajak.
Þeir félagar eru tveir saman á kajknum en þeim fylgir tökulið á landi sem er að gera heimildarmynd um ferðalagið. „Hugmyndin var að reyna að sanna að inúítar hafi getað róið til Skotlands á 17. öld. Þetta er ákveðin ráðgáta því að til eru sagnir um inúíta sem gekk í land á Skotlandi og engin veit hvaðan kom. Ég hélt að hann hefði mögulega geta róið þangað, en ég held það eiginlega ekki lengur,“ segir Olly Hicks í samtali við Austurfrétt og kímir.
Þeir félagarnir lögðu af stað með ferju frá Ísafirði í byrjun júlí. Hún flutti þá til Grænlands þaðan sem þeir réru aftur að Vestfjörðum og komu að landi á Hornströndum. Síðan hafa þeir róið með landi hingað austur og voru á Borgarfirði eystra í nótt. Þeir ætla að leggja upp frá Eskifirði til Færeyja á næstu dögum þegar veðrið verður hagstætt.
Á leið sinni með ströndinni koma þeir að landi á nóttunni og sofa í tjaldi. Það vildi svo til að þeir tjölduðu einmitt á Skaga aðeins örfáum dögum áður en ísbjörn fannst þar. „Við vorum með byssu í ferjunni en ákváðum svo að taka hana ekki með okkur í róðurinn af því að það var ekki mikill ís. Það er skrítið til þess að hugsa að ísbjörninn hafa svo verið á sama ferðalagi og við. Kannski við hefðum átt að hafa byssuna með okkur,“ segir Hicks.
„Það er bara einn róðrardagur eftir með ströndinni hér á Íslandi, við leggjum svo upp til Færeyja þegar okkur líst vel á veðrið. Það tekur okkur svona 4-5 daga að róa þangað,” segir Hicks en það er langlengsti leggurinn á opnu hafi í ferðinni. Þær nætur sem félagarnir eru á hafi úti sofa þeir í bátnum, setja út akkeri og flotholt og leggja sig báðir samtímis.
„Frá Færeyjum er svo styttra til Skotlands, það er bara svipaður leggur og Grænland – Hornstrandir og það er eyja á leiðinni sem við getum stoppað á og hvílt okkur meira að segja. Við verðum vonandi komnir til Skotlands í byrjun ágúst, og þá hvílum við okkur mjög vel,” segir Hicks og hlær. Nánar má lesa um ferðalagið hér.
