Átti að bjóða út strax

Lögfræðingur Samtaka iðnaðarins segir að sveitarfélagið Fljótsdalshérað hafi gert mistök með að fara í samstarf við Eignarhaldsfélagið Fasteign hf. um byggingu nýs grunnskóla á Egilsstöðum. Samtökin hafa sent fjármálaráðuneytinu erindi vegna málsins.

 

Eins og fréttavefur Austurgluggans greindi frá í gær sendi sveitarfélagið frá sér fréttatilkynningu þar sem saga málsins var reifuð. Þar segir meðal annars: „Eftir miklar vangaveltur bæjarstjórnar og starfsmanna Fljótsdalshéraðs og ráðgjafa þeirra um fjármögnun, hönnun og byggingu skólans var tekin sú ákvörðun að leita samstarfs við Eignarhaldsfélagið Fasteign hf (EFF).“

 

ImageSigurður B. Halldórsson, lögfræðingur Samtaka iðnaðarins, segir sveitarfélagið hafa gert mistök með þessu. „Sveitarfélagið gerði strax alvarleg mistök með samningum við eignarhaldsfélagið. Þarna átti að bjóða verkið út, ekki fara í samtarf. Fasteign hefði getað tekið þátt í þessu útboði eins og aðrir. Þarna er um gríðarlega fjármuni og hagsmuni að ræða.“

 

Í kjölfar umfjöllunar Austurgluggans seinasta fimmtudag sendi Sigurður bréf fyrir hönd SI til fjármálaráðuneytisins þar sem farið er fram á að kærunefnd útboðsmála kanni verklag við samningana. Í bréfinu segir að samkvæmt lögum um opinber innkaup beri að bjóða verkið út á evrópska efnahagssvæðinu. Engu skipti hvort framkvæmdin sé gerð í nafni sveitarfélagsins eða félagi í þess eigu. „Útboðsskyldan er með öllu fortakslaus.“

 

Í bréfinu er orðum Soffíu Lárusdóttur, forseta bæjarstjórnar,  sem sagði í útvarpsviðtali að útboð hefðu reynst sveitarfélögum illa vísað á bug. Skýringar Soffíu eru sagðar „með öllu órökstuddar og andstæðar lögum um opinber innkaup, en útboðsskyldan er hryggstykkið í þeim lögum. Reynslan er þvert á móti sú að ríki og sveitarfélög spara peninga með að fara með verk í útboð.“

 

Í samtali við Austurgluggann sagðist Sigurður bíða úrskurðar ráðuneytisins um hvort málinu yrði vísað til kærunefndarinnar. Það skýrðist líklega í vikunni. Hann vildi lítið tjá sig um hugsanlega skaðabótaskyldu. Verkið væri hafið og samið við Malarvinnslunnar en aðrir verktakar gætu talið sig hafa orðið fyrir tjóni. Hann sagði samtökin vilja koma þeim skilaboðum á framfæri að sveitarfélög standi rétt að málum við stórframkvæmdir.

 

Í bréfinu til ráðuneytisins er vakin athygli á að ekki sé hægt að sjá að bæjarstjórn Fljótsdalshéraðs hafi sett sér útboðsreglur í samræmi við lög um opinber innkaup.

Demo

Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.

Samfélagsmiðlar

Þessi síða notar vafrakökur (e. cookies) til þess að upplifun þín af henni sé sem best og til þess að hjálpa okkur að veita þér sem besta þjónustu.