Tvö ár frá stóru skriðunni
Þess verður minnst á Seyðisfirði í dag að tvö ár eru liðin frá því að stór aurskriða féll á bæinn og olli mikilli eyðileggingu. Gefin er út bók til að minnast atburðanna og haldin athöfn. Þá halda Seyðfirðingar einnig upp á 100 ára afmæli kirkjunnar.Kerti og tré eru tendruð á Einstaka tréni, en stakt tré sem stóð áður við húsið Sandfell var þar eitt eftir skriðurnar meðan hús og annað tortímdist í kring. Fólk er hvatt til að leggja leið sína að trénu í dag með kerti og leggja við hlið þess.
Í félagsheimilinu Herðubreið verður milli 16 og 19 í dag kynning á bókinni Skriðusögur, sem kemur út í dag. Ströndin Studio gefur bókina út en ritstjórar hennar eru Katja Goljat og Matjaž Rušt. Í henni er að finna ljósmyndir og 27 frásagnir íbúa staðarins um áhrif hamfaranna á líf þeirra.
Klukkan 17:00 opnar sýningin „Ef hús gætu talað“ í Seyðisfjarðarkirkju. Þar verða sýndar myndir af Seyðisfjarðarkirkju í gegnum tíðina en sýningin er hluti af hátíðahöldum í tilefni af 100 ára vígsluafmælis hennar. Þar verða einnig sýnd afmæliskort sem nemendur Seyðisfjarðarskóla hafa unnið í myndlist.
Auk viðburðanna á Seyðisfirði má minna á að Alcoa Fjarðaál í samvinnu við Sláturhúsið og Menningarstofu Fjarðabyggðar bjóða börnum á leiksýningu í dag. Snæfríður Ingvarsdóttir og Sigurður Ingvarsson hafa sett söguna um Litlu stúlkuna með eldspýturnar í nýjan búning.
Sýnt verður í Kirkju- og menningarmiðstöðinni á Eskifirði klukkar 11 og 12 í dag en í Sláturhúsinu klukkan 16 og 17. Sýningin er 25 mínútur og er hugsuð fyrir börn á aldrinum 3–7 ára fólk á öllum aldri sé velkomið.
Þá stendur Kór Fjarðabyggðar fyrir jólatónleikum í Kirkju- og menningarmiðstöðinni á Eskifirði klukkan 15:00. Barnakórar í Fjarðabyggð syngja með kórnum. Stjórnandi er Kaido Tani.
