Upprisu orgelsins fagnað í kvöld
Í janúarmánuði fór fram gagnger hreinsun, viðgerð og stilling á pípuorgeli Egilsstaðakirkju og er það því orðið eins og nýtt. Verkið unnu þau Björgvin Tómasson orgelsmiður og kona hans, Margrét Erlingsdóttir rafvirki. Af því tilefni verður fagnað með orgel- og söngkvöldi í kirkjunni í kvöld, 5. mars kl. 20:00.
Orgelið kom í Egilsstaðakirkju haustið 1978, fjórum árum eftir vígslu kirkjunnar. „Mælt er með að orgel séu hreinsuð á 10-15 ára fresti til að viðhalda hljómgæðum sínum, en þetta orgel hefur aldrei farið í svona gagngera hreinsun áður, svo það var orðið afar aðkallandi,“ segir Þorgeir Arason sóknarprestur í Egilsstaðakirkju.
Hann segir aðdragandann að verkinu hafa verið nokkuð langan. Verk af þessu tagi er kostnaðarsamt fyrir lítinn söfnuð og þörf á mikilli og sérhæfðri vinnu.
Á aðalsafnaðarfundi vorið 2018 var svo stofnaður Tónlistarsjóður kirkjunnar. Í henni sitja Björn Ingimarsson bæjarstjóri, Jarþrúður Ólafsdóttir kennsluráðgjafi og kórfélagi og Torvald Gjerde organisti í stjórn sjóðsins.
Í tilkynningu frá kirkjunni segir að var leitað hefi verið til einstaklinga, fyrirtækja og félagasamtaka á svæðinu um að leggja verkefninu lið, auk annarra sókna í prestakallinu, en við Egilsstaðakirkju fara fram ýmsar athafnir og viðburðir sem þjóna stærra svæði en sókninni einni.
„Svo komu kórar og hljómlistarmenn líka fram á tónlistarviðburðum þar sem aðgangseyrir og frjáls framlög runnu til verkefnisins. Það er mjög ánægjulegt var að finna allan þann velvilja sem kirkjan og menningarlíf hennar nýtur í samfélaginu hér á Fljótsdalshéraði,“ segir Þorgeir.
Stærsti einstaki styrkurinn kom frá Kvenfélaginu Bláklukku á Egilsstöðum, kr. 500.000. Þrjú hótel á svæðinu styrktu verkefnið einnig í formi gistingar og uppihalds í viku í senn fyrir orgelsérfræðingana.
„Alls söfnuðust um þrjár og hálf milljón í sjóðinn eða nánast allur kostnaður við verkið. Vilja stjórn sjóðsins og sóknarnefnd Egilsstaðakirkju koma á framfæri innilegu þakklæti sínu til allra þeirra sem lögðu verkefninu lið,“ segir einnig í tilkynningunni.
Þorgeir segir að Egilsstaðakirkja sé virkilega ánægð með afraksturinn af vinnu Björgvins og Margrétar. „Hljóðið í orgelinu er nú miklu tærara en áður, vélasuð horfið og ekki spillir að loftið í kirkjunni er hreinna og betra, enda allt að 40 ára gamalt ryk horfið úr hljóðfærinu.
Svo er gaman að segja frá því að Hermann Eiríksson trésmiður aðstoðaði Björgvin við hljóðeinangrun á mótor og blásara svo og við lagningu lagna upp í orgelið til að taka inn loft í það ofar en áður. En Hermann hefur sungið í Kór Egilsstaðakirkju frá því að kirkjan var vígð og var einmitt meðal lykilmanna í orgelkaupunum á sínum tíma.“
Til að fagna „upprisu“ hljóðfærisins bjóða Kór Egilsstaðakirkju og Torvald Gjerde organisti kirkjunnar til orgel- og söngkvölds í kirkjunni í kvöld, fimmtudaginn 5. mars kl. 20:00. „Fjölbreytt tónlistardagskrá, samsöngur og kaffiveitingar í lokin. Allir velkomnir og frítt inn en frjáls framlög vel þegin því að enn vantar örlítið upp á að tekist hafi að safna fyrir öllum kostnaði við verkefnið,“ segir Þorgeir að lokum.
Orgelið fyrir hreinsun. Myndin er aðsend.
