Yndislegir Dagar myrkurs á Fljótsdalshéraði

Höfundur: Steinunn Ásmundsdóttir • Skrifað: 23. nóvember 2009.

Dagarnir 5. - 15. nóvember voru helgaðir ljósinu og myrkrinu á Austurlandi og var ýmislegt gert til að hlýja hjartanu og huganum á Héraði á þessum dögum. Menningarmiðstöð Fljótsdalshéraðs lét ekki sitt eftir liggja og skipulagði ýmislegt skemmtilegt í skammdeginu.

Í tilkynningu frá Menningarmiðstöð Fljótsdalshéraðs segir að meðal annars hafi Kristín Rut Eyjólfsdóttir opnað myndlistarsýningu í anddyri Sláturhússins á Egilsstöðum þar sem hún sýndi ný verk. Einnig var Kristín með samfélagsverk þar sem íbúar bæjarins voru hvattir til að taka þátt í að mála eitt stórt listaverk og leggja frjáls framlög í pott í leiðinni. Sá pottur verður afhentur Geðhjálp á Austurlandi til eignar og nota þar sem þau finna mestu þörfina. Einnig er fyrirtækjum og einstaklingum gefinn kostur á að bjóða í samfélagsverkið stóra, en það er málað með svartri málningu á töluvert stóra frauðplastplötu. Verkið er til sýnis í Sláturhúsinu fyrir þá sem hafa áhuga á að koma með boð í það. Nemendur í sjónlistum í Menntaskólanum á Egilsstöðum héldu stóra yfirlitssýningu yfir verk sín í Sláturhúsinu á sama tíma og var það mjög áhugaverð og fjölbreytt sýning þar sem unnið var með textaverk og bókverk á mjög fjölbreyttan og frjóan hátt. Kennari þeirra er myndlistarkonan Ólöf Björk Bragadóttir.

Tvö námskeið voru haldin til að birta upp skammdegið og voru það brjóstsykursgerð og kertagerð. Bæði námskeið lukkuðust afar vel og voru vel sótt. Kertagerðin fór fram í Sláturhúsinu á efri hæðinni með yndislegt útsýni yfir skóg og fljót. Framleidd voru dýfikerti, kóngakerti, fléttukerti, tólgarkerti og býflugnavaxkerti auk þess sem krem var búið til úr ólífuolíu og býflugnavaxi. Tókst þetta einstaklega vel og mun einn námskeiðsgesturinn hafa keypt kertagerðarefni í massavís og ætlar að bjóða handgerð jólakerti til sölu á Jólamarkaði BARRA þann 12. desember næstkomandi.

Gestur á myndlistarsýningu Kristínar Rutar Eyjólfsdóttur í Sláturhúsinu spjallar við listakonuna.

Sjónlistir menntskælinga skoðaðar. Kertagerðarnámskeið í Sláturhúsinu. Myndir/Ingunn Þráinsdóttir.

Vildarvinir

Austurfrétt birtir fréttir að austan alla virka daga, öllum aðgengilegar og reiðir sig á auglýsingatekjur og styrki frá lesendum sínum til að halda úti þjónustunni.

Hvers virði finnst þér að hafa aðgang að fréttaþjónustu á borð við þessa?

Smelltu hér ef þú vilt styrkja Austurfrétt.

Yndislegir Dagar myrkurs á Fljótsdalshéraði

Vildarvinir

Fréttaflokkar

Innsent efni

Austurfrétt ehf.

Samfélagsmiðlar