Körfubolti: Haukar drógu Hött með sér niður í fallbaráttuna
Körfuknattleikslið Hattar fór illa að ráði sínu þegar það tapaði 86-89 fyrir botnliði Hauka í úrvalsdeild karla í körfuknattleik á föstudagskvöld. Úrslitin þýða að Höttur er fyrir alvöru kominn í fallbaráttu við upphaf seinni helmings deildarinnar.Það var góður kafli lok fyrsta leikhluta sem fyrst bjó til forskot Hauka. Þeir skoruðu níu stig gegn tveimur síðustu 3,5 mínúturnar og voru 12-22 yfir eftir hann. Hattarmenn áttu hins vegar áhlaup í öðrum leikhluta, fóru úr 16-30 í 33-33 og voru yfir 39-38 í hálfleik.
Hattarmenn virtust ætla að halda áfram á svipaðri braut en um miðjan þriðja leikhluta snéru Haukar leiknum aftur sér í vil, skoruðu þá ellefu stig í röð. Höttur svaraði með áhlaupi undir lokin og náði muninum niður í tvö stig, 62-64.
Loksins þriggja stiga körfur í blálokin
Bilið breikkaði áfram í upphafi fjórða leikhluta en Hattarmenn náðu þó engu að síður að búa sér til tækifæri undir lokin. Obie Trotter skoraði tvær þriggja stiga körfur í röð sem breyttu stöðunni úr 74-85 í 80-85 þegar um mínúta var eftir. Í viðbót fylgdi þriggja stiga karfa frá Justin Roberts. Þetta voru einu þriggja stiga körfur þeirra tveggja í leiknum og helmingur þeirra skota sem Höttur setti niður fyrir utan línuna á föstudagskvöld.
Þá fylgdi í kjölfarið karfa úr teignum og svo vítaskot að auki sem kom Hetti í 86-88 þegar 16,5 sekúndur voru eftir. Höttur mætti Haukum framarlega eftir innkasti og gestirnir misstu boltann út af. Höttur tók leikhlé og leitaði að þriggja stiga skoti í von um að vinna leikinn.
Gott skot var ekki auðfundið og endaði með að Gustav Suhr-Jessen skaut úr vinstra horninu en hitti ekki körfuna. Haukar náðu í víti, skoruðu úr því seinna. Þar með voru tvær sekúndur eftir. Justin Roberts skaut frá miðju en var fjarri körfunni.
Roberts var stigahæstur á vellinum með 26 stig. Hann spilaði virkilega vel í öðrum leikhluta þegar hann keyrði ákaft á körfuna. Obie skoraði 17 stig og Nemanja Knezevic 17, auk þess að taka 12 fráköst.
Hvað gerðist og hvað þýða úrslitin?
Leikur Hattar var heilt yfir flatur, helst í öðrum leikhluta var einhver ákefð. Í liðinu eru góðar þriggja stiga skyttur en þær hafa ekki náð sér á strik síðustu leiki, utan seinni hálfleiksins gegn Álftanesi fyrir jól enda vannst sá leikur. Varnarleikur liðsins í kvöld var ekki góður, of oft voru Hattarmenn að horfa á boltann og steingleymdu manninum sem þeir áttu að dekka. Það segir sitt að Haukar skoruðu 62 stig úr teignum og voru með 70,5% nýtni þar. Viðar Örn Hafsteinsson, þjálfari Hattar, sagði eftir leikinn að frammistaðan hefði verið hræðileg.
Þessi úrslit sem önnur þýða að Höttur er kominn í fallbaráttu þegar seinni helmingur deildarinnar er að hefjast. Haukar eru á botninum með sex stig en Höttur í næst neðsta sæti með átta stig. Tveimur stigum ofar eru Álftanes, Valur og ÍR sem unnu öll sína leiki í umferðinni. Það þýðir þó að jafn langt er fyrir Hött niður í botnsætið og upp í úrslitakeppnisæti. Liðin fjögur í 4. – 7. sæti eru síðan fjórum stigum á undan.
