Afmælishátíð Súlunnar

Höfundur: Gunnar Gunnarsson • Skrifað: 27. júní 2008.

Ungmennafélagið Súlan á 80 ára afmæli í ár. Af því tilefni verður mikið um dýrðir á Stöðvarfirði nú um helgina.

Afmælishátíðin hefst á laugardaginn kl. 14:00 með vígslu nýs sparkvallar. Að því loknu fer fram Róbert Jack-mótið í knattspyrnu en þar etja heimamenn kappi við nágranna sína úr Breiðdal. Þar á eftir bjóða sveitarfélagið Fjarðabyggð og KSÍ gestum upp á kaffiveitingar.

Hátíðardagskráin heldur áfram kl. 17:00 en þá sýnir leikhúsið Frú Norma leikverkið Soffía mús á tímaflakki. Frú Norma er eina atvinnuleikhús á Austurlandi og gaman er að segja frá því að höfundur leikverksins og tónlistarinnar við það, systurnar Sigríður Lára og Bára Sigurjónsdætur eru einnig héðan að austan.

Klukkan 20:00 fer síðan fram golfmót á golfvelli staðarins.

Hátíðin heldur áfram á sunnudag og hefst þá dagskráin með sprelli í sundlaug staðarins kl. 11:00. Sundlaugin er einmitt 25 ára á þessu ári. Þarna verður sprellað eitthvað fram eftir degi.

Árlegt minningarhlaup um Önnu Maríu verður hlaupið kl. 14:00.

Að síðustu verður svo k. 16:00 haldin grillveisla á ræktarsvæði skógræktarfélagsins Nýgræðings. Það félag fagnar einmitt einnig stórafmæli í ár en það er 65 ára.