Helgin: Sumarhátíð (smá rigning), listir og skemmtilegar gönguferðir

Höfundur: Stefán Bogi Sveinsson • Skrifað: 10. júlí 2020.

Líkt og flestar helgar sumarsins eru í boði bæði tónleikar, listviðburðir og skipulögð útivist á Austurlandi um helgina. Hin árlega Sumarhátíð UÍA fer einnig fram á Egilsstöðum.

Sumarhátíðin fer fram með hefðbundnu sniði. Um er að ræða íþróttakeppni fyrir börn fædd 2005 og síðar og keppt er í sundi, frjálsum íþróttum, útikörfubolta, rafíþróttum, frisbígolfi, bogfimi, skák og á fjallahjólum svo eitthvað sé nefnt.

Mótshaldarar vilja minna fólk á ábyrga hegðun og smitvarnir en nánari upplýsingar mótið, dagskrá þess og reglur er að finna á uia.is.

Af öðrum íþróttaviðburðum á svæðinu má nefna að Dyrfjallahlaupið fer fram á laugardag. Um er að ræða árlegt 23 km utanvegahlaup með um 1000 m hækkun í kringum Dyrfjöllin sjálf. Hlaupið verður af stað frá Borgarfirði kl. 11.

Flamenco og faðmlög

Íslenski flamenco-gítarleikarinn Reynir del Norte kemur fram á tónleikum í Fjarðarborg á Borgarfirði í kvöld. Reynir er fæddur og uppalinn á Hvanneyri en hefur búið um árabil í Granada, Spáni þar sem hann vinnur sem Flamenco listamaður.

Reynir del Norte gaf út sína fyrstu sólóplötu, El Reino de Granada, í desember 2019 sem jafnframt er fyrsta íslenska Flamenco hljómplatan. Platan inniheldur 8 tónsmíðar Reynis sem fluttar voru af honum sjálfum í samstarfi við nokkra af færustu Flamenco listamönnum Granada.

Lög plötunnar verða flutt á tónleikunum sem og nokkur þekkt íslensk dægur-og þjóðlög útsett af Reyni fyrir Flamenco gítar. Þema tónleika verður því íslenskt flamenco.

Reynir er þekktur fyrir orkumikinn og tilfinningaríkan flutning í bland við skemmtilegar sögur og spjall á mili laga um líf hans í Andalúsíu. Í fyrra hélt hann sömuleiðis frábæra tónleika í Fjarðarborg sem enginn gleymir sem þá upplifði.

Svavar Knútur Kristinsson og Kristjana Stefánsdóttir hafa unnið saman í mörg ár og sendu nýverið frá sér plötuna Faðmlög. Þau eru á ferð um Austurland um helgina og halda tónleika á Egilsstöðum, Seyðisfirði, Borgarfirði og Höfn í Hornafirði líkt og Austurfrétt hefur áður greint frá.

Gönguferðir við flestra hæfi

Annars vegar er á laugardag í boði þriggja skóa ferð í Sönghofsdal, gullfallega gróðurvin á hálendinu norðan Vatnajökuls sem er umlukin alls kyns bergmyndunum, tröllvöxnum, stórum og smáum. Keyrt er í Möðrudal, inn Kverkfjallaveg og inn fyrir Kreppubrú. Þaðan er gengið um 9 kílómetra í Sönghofsdal en gangan er um 18 kílómetrar fram og til baka,

Mæting er við hús Ferðafélags Fljótsdalshéraðs, Tjarnarási 8, Egilsstöðum. Lagt verður af stað þaðan klukkan 8:00 eftir að sameinast hefur verið í bíla. Verð er 500 krónur og Stefán Kristmannsson leiðir gönguna. Minnt er á að nauðsynlegt er að skrá sig í gönguna því mögulega þarf að gera breytingar vegna veðurs.

Á sunnudag er svo í boði Grallaraferð yfir Gönguskarð, úr Njarðvík, yfir í Stapavík og þaðan í Unaós. Þessi ferð er hugsuð fyrir fjölskyldur og yngri kynslóðina og því farið hægara yfir.

Tilgangur ferðarinnar er samvera fjölskyldunnar, að börnin takist á við áskoranir, efli trú á eigin getu og læri um nærumhverfið og náttúruna. Leiðin er um 11 kílómetrar, hækkun um 415 metrar og heildartími ferðar, með akstri, um 6-7 klukkustundir. Ferðin er þátttakendum að kostnaðarlausu.

Lagt er af stað frá húsi Ferðafélags Fljótsdalshéraðs, Tjarnarási 8 á Egilsstöðum, kl 10:00 eftir að hefur verið sameinast í bíla. Hámarksfjöldi er 30 manns og leiðsögumenn eru Þórdís Kristvinsdóttir og Hildur Bergsdóttir.

Nánari upplýsingar um ferðirnar og skráningu má finna á heimasíðu Ferðafélags Fljótsdalshéraðs.

Opnun sýningar og útimessa

Egilsstaðaprestakall stendur fyrir árlegri útimessu í dreifbýli prestakallsins. Að þessu sinni verður messað á flötinni við Geirstaðakirkju í landi Litla-Bakka í Hróarstungu sunnudaginn 12. júlí kl. 16:00. Prestur er Þorgeir Arason og Torvald Gjerde leikur á harmoniku undir sálmasöng. Skúli Björn Gunnarsson segir frá Geirstaðakirkju og tilgátunum að baki byggingunni. Skipuleggjendur mæla með að taka með sér til messunnar eitthvað til að sitja á og ekki spillir nestisbiti svo hægt sé að sameinast í messukaffi í lokin.

Rúllandi snjóbolti er stærsta samtímalistsýning á landinu og er nú haldin í 13. sinn. Austurfrétt hefur áður fjallað um sýningu ársins en hún verður formlega opnuð gestum í Bræðslunni á Djúpavogi á laugardag kl. 15 og eru allir velkomnir.