Austurglugginn efnir til ljósmyndasamkeppni fyrir krakka í sumar. Þátttakendur geta allir verið sem fæddir eru árið 1997 eða síðar (ath. að í auglýsingu í Austurglugganum misritaðist ártalið). Bestu myndirnar verða birtar í blaðinu og sýndar á ljósmyndasýningu í haust. Höfundur langbestu myndarinnar fær góð verðlaun. Reglur keppninnar eru eftirfarandi:
Fulltrúar Landsvirkjunar og Vegagerðarinnar hittust í gær og ræddu á fundi hverjir gætu orðið hugsanlegir veghaldarar allra þeirra vega og slóða sem orðið hafa til vegna Kárahnjúkavirkjunar og einnig þeirra sem fyrir voru á hinu víðfeðma svæði sem áhrifasvæði virkjunarinnar nær yfir. Engar ákvarðanir hafa verið teknar og eru þessi mál á umræðustigi enn sem komið er. Hreggviður Jónsson tók árið 2004 saman skýrslu um tilurð vega á svæðinu og meðal annars eru þar fjörtíu ára gamlir vegir sem RARIK lét gera. Landsvirkjun og Vegagerðin ákveða hvaða vegi fyrirtækin hyggjast eiga og reka áfram og sveitarfélögin Fljótsdalshreppur og Fljótsdalshérað þurfa svo væntanlega að gera upp við sig hvort og þá hvaða vegi þau hyggjast ábyrgjast sem veghaldarar.
Nýr forstöðumaður bókasafnsins í Neskaupstað, Óskar Þór Þráinsson, hefur hafið störf. Óskar Þór er nýfluttur á Norðfjörð og mun sjá um rekstur almenningsbókasafnsins í Neskaupstað og Skólabókasafns Nesskóla. Óskar Þór er bókasafns- og upplýsingafræðingur og hefur starfað á sviði skjalastjórnunar og upplýsingaþjónustu undanfarið ár en hefur mikla reynslu og þekkingu á bókmenntum, þjónustu, rafrænum miðlum og upplýsingatækni. Óskar Þór býður bæjarbúa og sveitamenn á öllum aldri velkomna á bókasafnið og kallar eftir óskum og hugmyndum, nú eða bara spjalli yfir kaffibolla.
Austurglugginn kemur í sumar út á föstudögum. Fyrir mistök komst blaðið ekki til Vopnafjarðar fyrir póstdreifingu í dag og því kemur blaðið ekki fyrr en á mánudag til lesenda. Eru þeir beðnir velvirðingar á þessu og vonað að Austurglugganum verði fyrirgefið í þetta skiptið.
Með kveðju frá ritstjóra.
Á mánudag verður undirritað samkomulag um stofnun og starfsemi nýrrar Matvælamiðstöðvar Austurlands. Hún verður til húsa í Mjólkurstöð MS á Egilsstöðum. Að henni koma Matís, Auðhumla/MS, mjólkurframleiðendur á Héraði, Búnaðarsamband Austurlands, Þróunarstofa Austurlands og sveitarfélagið Fljótsdalshérað. Á næstunni mun Matís ráða starfsmann að Matvælamiðstöðinni og húsnæðið verður undirbúið fyrir starfsemina. Í Matvælamiðstöð Austurlands verður samstarf um vöruþróun og rannsóknir á mjólkurafurðum o.fl.
Austurglugganum er að þessu sinni dreift á öll heimili á Austurlandi og fylgir blaðinu kynningarblað um Jazzhátíð Egilsstaða á Austurlandi sem hefst í næstu viku á Egilsstöðum, í Neskaupstað og á Seyðisfirði. Meðal efnis í Austurglugganum er viðtal Gunnars Gunnarssonar við Matti Vanhanen, forsætisráðherra Finna, um ESB og landbúnaðarmálin, leiðaraumfjöllun um kvenréttindadaginn í dag og viðtal við Sigrúnu Steindórsdóttur sem lauk á dögunum sveinsprófi í húsgagnasmíði, ein fárra kvenna. Þá eru umfjöllun og myndir frá brautskráningu nemenda við Verkmenntaskóla Austurlands og Menntaskólann á Egilsstöðum. Eins og glöggir lesendur hafa eflaust áttað sig á hefur útgáfudegi Austurgluggans verið hnikað til og kemur hann út á föstudögum í sumar. Austurglugginn; - brakandi ferskur og sumarlegur.
Dagana 13.-15. júní stóð hestamannafélagið Blær fyrir æskulýðsdögum á félagssvæði sínu að Kirkjubólseyrum í Norðfirði. Er óhætt að segja að þar hafi verið líf og fjör en rúmlega 40 börn og unglingar tóku þátt í ár og voru með aðstandendum þeirra um 100 manns á svæðinu þessa daga. Í dag og á morgun fagnar Blær fjörtíu ára starfsafmæli félagsins.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.