Félag ljóðaunnenda á Austurlandi er stórhuga varðandi útgáfu sína í ár. Úrval ljóða og sagna eftir Gunnar Valdimarsson frá Teigi í Vopnafirði kemur út í endaðan maí. Um mitt sumar hyggst félagið gefa út bókina Og lífsfljótið streymir, eftir Oddnýju Björgvinsdóttur frá Fáskrúðsfirði og í sumarlok kemur út bókin Bréf til næturinnar, eftir Kristínu Jónsdóttur á Hlíð í Lóni. Verður sú bók níunda bók bókaflokksins Austfirsk ljóðskáld.
Félagið sótti um styrk hjá Menningarráði Austurlands og fékk 300 þúsund til útgáfunnar.
Í fyrra kom út ljóðabókin Vébönd, eftir Þorstein Bergsson og hefur hún hlotið ágætar viðtökur.
Samfélagssjóður Alcoa í Bandaríkjunum hefur ákveðið að styrkja Starfsendurhæfingu Austurlands um 70.000 Bandaríkjadali, eða um 8,9 milljónir króna á tveggja ára tímabili. Steinþór Þórðarson, framkvæmdastjóri mannauðsmála hjá Alcoa Fjarðaáli, afhenti fyrri hluta styrksins, 35.000 Bandaríkjadali í dag.
Fjarðabyggð tapaði fyrir Haukum, 3-1 í 1. deild karla í knattspyrnu í gær. Höttur gerði 1-1 jafntelfi gegn Víði í Garði. Einherji hefur fengið til sín fyrrverandi landsliðs- og atvinnumann í knattspyrnu. Fardögum knattspyrnumanna lauk á föstudag.
Hundaklúbbur Austurlands var stofnaður í febrúar árið 2007. Á stofnfund mættu um tuttugu manns og var vilji til að stofna félag þar sem fólk gæti deilt þessu áhugamáli sínu og sem vettvang fyrir námskeið í hundahaldi. Metete Myrheim á Egilsstöðum segir stofnun klúbbsins bráðnauðsynlega enda sé mjög mikilvægt að fólk læri að umgangast hunda sína og þjálfa þá.
Héraðsdómur Reykjavíkur hefur hafnað kröfu AFLs Starfsgreinafélags á hendur Landsvaka um að fá í hendur yfirlit eigna peningamarkaðssjóðs gamla Landsbankans tímabilið september til október 2008. Landsvaki fór þá með sjóðinn. Héraðsdómur bar fyrir sig formgalla í frávísun sinni og telur félagið dóminn þannig víkja sér undan því að taka afstöðu í flóknu máli. AFL hefur áfrýjað málinu til Hæstaréttar.
Akstursíþróttamaðurinn Ólafur Bragi Jónsson, úr Akstursíþróttafélaginu
START, var um helgina útnefndur íþróttamaður UÍA árið 2008.
Viðurkenningin var afhent á þingi sambandsins á Seyðisfirði.
Munið þið eftir sögunni um Bakkabræður, þá Gísla, Eirík og Helga, sem vörðu löngum tíma í að bera sólarljósið að utan inn í myrkan bæinn? Bakkabræður byggðu sér bæ og hann var ágætur, nema þeir gleymdu glugganum. En þeim fannst enginn vandi að bæta úr því, þeir gátu tekið sólarljósið með höndunum úti á túni og borið það inn í bæinn í húfunum sínum.
Álfasteinn ehf., sem átti sinn heimavöll á Borgarfirði eystri í áratugi frá 1981 en flutti vinnslu sína til Raufarhafnar fyrir fáum misserum, er í verulegum rekstrarvandræðum. Stjórn félagsins hefur sagt af sér.
Í Austurglugga þessarar viku er ýmislegt forvitnilegt. Má þar nefna umfjöllun um sigurgöngu Austfirðinga á sýningunni Ferðalögum og frístundum, lok skíðavertíðar og undirbúning stórs kajakmóts á Norðfirði. Nýr þingmaður Austfirðinga, Björn Valur Gíslason, skrifar um sjávarútvegsmálin og Guðmundur Karl Jónsson um veg yfir Öxi. Auk frétta og íþrótta er svo matgæðingurinn á sínum stað. Austurglugginn fæst á betri blaðsölustöðum.