Vegna fréttar um að starfsmönnum sveitarfélagsins Fjarðabyggðar í áhaldahúsum á Eskifirði, Fáskrúðsfirði, Norðfirði og Stöðvarfirði og skrifstofufólki á Norðfirði og Reyðarfirði hefði verið sagt upp fyrir helgina, hafði Helga Jónsdóttir bæjarstýra samband við vefinn. Segir hún að ekki hafi verið um uppsagnir að ræða heldur hafi föstum umframkjörum allra starfsmanna sveitarfélagsins verið sagt upp. Verði viðbótarkjör tekin til endurskoðunar með það að markmiði að lækka launakostnað um 10% og jafna kjör milli fólks. Helga segir markmiðið að ljúka endurskoðun allra fastasamninga í mars. Hún segir að áður en þessar aðgerðir voru kynntar starfsfólki hafi hún átt fundi með forsvarsmönnum stéttarfélaganna ; AFLs, FOSA og Starfsmannafélags Fjarðabyggðar. ,,Ég varð ekki vör við annað en fullur skilningur væri á stöðunni og mönnum þætti sú leið sem fara á málefnaleg og gæta meðalhófs,“ segir Helga.
Missagt er í Austurglugganum þessa viku um opnunartíma skíðasvæðisins í Oddsskarði. Skal áréttað að opið er á milli kl. 11 og 16 um helgar og virka daga milli kl. 17 og 20. Topplyftan verður höfð opin um helgar og frídaga frá 1. mars. Á vefsíðu Oddsskarðs segir að nú sé þar tæplega tveggja stiga frost og vestnorðvestan 0,9 metrar. Búið er að troða gil, æfingabakka og sunnan við topplyftu og einnig við byrjendalyftu. Aðrar brekkur verði ekki troðnar í dag. Vegna snjóflóðahættu er Magnúsargil merkt með borða þar sem það er lokað og má alls ekki fara undir Oddsskarð eða ofan við byrjendalyftu. Gott veður og færi er nú einnig í Stafdal við Seyðisfjörð.
Í dag féll snjóflóð á veginn um Njarðvíkurskriður og lokaði honum um tíma. Snjóruðningsbíll sem ryðja átti veginn til Borgarfjarðar réð ekki við að moka flóðinu burt, þar sem það var um tveir metrar á þykkt. Grafa var fengin á staðinn í moksturinn og er vegurinn nú opinn að nýju. Nokkuð hefur verið um snjóflóð undanfarið, einkum á Norðfirði og í Seyðisfirði.
Árlegt Búnaðarþing Bændasamtaka Íslands hefst sunnudaginn 1. mars og stendur til miðvikudagsins 4. mars. Búnaðarþing verður sett með viðhöfn á sunnudaginn en yfirskrift setningarathafnarinnar er „Treystum á landbúnaðinn“. Í vikunni verða hefðbundin þingstörf þar sem meðal annars verður fjallað um mál sem tengjast ESB-umræðu, raforkuverði, matvælaöryggi, fjármagnskostnaði og rekstrarumhverfi bænda.
Við íkveikju lá í gær í elsta húsi Borgarfjarðar eystri, sem nú er nýtt sem sumarhús. Slökkvilið var kallað út síðdegis í gærdag. Kveikt hafði verið upp í gamalli Solo-eldavél til að hlýja húsið en ekki verið lækkað aftur eftir að hitna tók innanhúss og var eldavélin orðin rauðglóandi. Skapaði það mikinn hita í húsinu en ekki kviknaði eldur, þó aðeins virðist hafa verið tímaspursmál hvenær kvikna myndi í.
Það er eitthvað magnað við tónlist hins skoska Charles Ross, tónskálds á Eiðum. Eins og hann leiti niður á milli hvers einstaks tóns og dragi þaðan upp úr djúpum aldanna tungumál eða tilfinningu sem mannssálin hefur gleymt í tímans rás; hljóð, skynjun, spennu, sem var til áður en tungutak mannsins þróaðist. Hann segist vera á þeim slóðum í tónsköpun sinni nú, en hann hefur samið fjöldan allan af tónverkum.
Starfsmönnum sveitarfélagsins Fjarðabyggðar í áhaldahúsum á Eskifirði, Fáskrúðsfirði, Norðfirði og Stöðvarfirði var sagt upp í dag. Fjarðabyggð sagði einnig upp skrifstofufólki á Norðfirði og Reyðarfirði í gær. Tilgangurinn mun vera að afnema þær greiðslur til starfsfólksins sem eru umfram kjarasamninga. Bæjaryfirvöld hafa sett stefnuna á 10% niðurskurð í launakostnaði hjá sveitarfélaginu á þessu ári og er þetta liður í að fylgja samþykkt þar um eftir.
Breiðdalshreppur auglýsir stöðu forstöðumanns Breiðdalsseturs á Breiðdalsvík. Starfið felur í sér framkvæmdastjórn er varðar starfsemi, þróun og eftirfylgni við uppbyggingu og rekstur á starfsemi Breiðdalsseturs í Gamla kaupfélagshúsinu. Starfsstöð er á Breiðdalsvík.