,,Menn mega vara sig á að reka ekki hæfileikafólkið þrátt fyrir samdrátt, því hæfileikar eru verðmætasta eign okkar í kreppunni,“ segir Þorsteinn Sigfússon, prófessor og forstjóri Nýsköpunarmiðstöðvar Íslands. Hann fjallaði um tækifæri í nýsköpun á Austurlandi í erindi á Egilsstöðum fyrir skömmu. Þorsteinn segir áhættufælni ekki eiga við á þessum tímum því áhætta sé drifkraftur. Vöruþróun megi ekki stöðvast því kreppan taki enda og lífið haldi áfram. Hann segir heldur ekki mega slaka á kröfum í umhverfismati þrátt fyrir tilhneygingu til að gefa lausan tauminn í þeim efnum. Útrásin þurfi að halda áfram og nýsköpun að vera lykilmarkmið.
Það rigndi óskaplega sums staðar á Austurlandi í nótt og varð vart við þrumur og eldingar þegar klukkan nálgaðist 01. Slíkt er heldur sjaldgæft hér um slóðir. Heldur er að létta til og búist við ágætu veðri með 15-23 stiga hita í dag þó hangi í súld með köflum. Spáð er rigningu aftur í nótt og fram á þriðjudag, en þá er sú gula víst væntanleg að nýju. Hiti á að vera frá 10 upp í 18 stig næstu daga.
30. júní rann út frestur til að greiða fyrir hreindýraveiðileyfi. Þeir sem ekki greiddu missa leyfið og verður þeim úthlutað til fólks sem er á biðlista eftir leyfum. Til stendur að staðfesta gild veiðileyfi í dag.
Annarrar deildar lið Hattar var tíu mínútum frá því að slá
úrvalsdeildarlið Breiðabliks út úr bikarkeppni karla í knattspyrnu.
Fjarðabyggð steinlá fyrir Fylki.
Héraðsdómur Reykjavíkur hefur dæmt Mylluna ehf. til að greiða fyrrum starfsmanni fyrirtækisins tæplega 29 milljónir króna með vöxtum í bætur vegna vinnuslyss sem varð haustið 2005. Maðurinn krafðist ríflega 47 milljóna í skaðabætur.
Sumarhátíð UÍA er nú á lokaspretti sínum í dag. Keppnin hefur farið vel fram, þrátt fyrir köflótt veðurfar, sem nú virðist standa til bóta. Lokið er keppni í knattspyrnu, golfi og sundi og síðasti dagur frjálsíþróttakeppninnar af þremur framundan. Hefjast leikar á Vilhjálmsvelli kl. hálftíu og reiknað með að keppni ljúki um klukkan þrjú. Í dag keppa meðal annarra tíu ára og yngri sem eru að stíga sín fyrstu spor á frjálsíþróttunum. Kl. 14 byrjar opin boccia keppni, sú fyrsta með því sniði sem haldin er á Sumarhátíð. Þrír eru saman í liði og geta þeir sem vilja sett saman lið og skráð til leiks. Klukkan þrjú verður ræst 10 km bæjarhlaup frá Fjölnotahúsinu í Fellabæ. Klukkustund síðar verður 5 km skemmtiskokk í Selskógi.
Austurglugginn er kominn út, fjölbreyttur og fróðlegur að vanda. Fjallað er meðal annars um fjölmenna gönguviku í Fjarðabyggð, nýstárlegar tónlistarsumarbúðir, fund Framtíðarinnar lifir sem haldinn var nýverið í Möðrudal, jazzhátíð JEA, minningartónleika um Helga Arngrímsson og nýja kvikmynd Steingríms Karlssonar sem tekin verður upp á Austurlandi. Þá er fótbolta vikunnar og öðrum íþróttaviðburðum gerð góð skil, auk annarra íþrótta og frétta. Austurglugginn fæst á betri blaðsölustöðum.
Þorkell Ásgeir Jóhannsson, yfirflugstjóri Mýflugs skrifar um sjúkraflug: Þessi grein er ekki skrifuð til höfuðs ríkisstjórninni, stjórnmálasamtökum eða nokkrum opinberum stjórnvöldum. Enda er mér ljóst að enginn, í sporum núverandi landsfeðra okkar, er öfundsverður af sínu hlutskipti um þessar mundir, þar sem stoppa þarf í fjárlagagöt upp á hundruð milljarða, jafnvel svo að öryggishagsmunir hafa orðið að víkja. Nægir að benda á hvernig komið er fyrir þyrlusveit Landhelgisgæslunnar. En ég tel mig knúinn til að koma á framfæri áhyggjum mínum um atriði þessu tengd, sem varða lífsgæði og -öryggi landsbyggðarfólks með beinum hætti, en þó þannig að fáum er það fullljóst.
