Ríkisendurskoðun hyggst ekki grípa til frekari aðgerða í máli Hannesar
Sigmarssonar, yfirlæknis Heilbrigðisstofnunar Austurlands (HSA) að svo
stöddu en hvetur heilbrigðisráðuneytið til að grípa til viðeignadi
aðgerða. Í bréfi sem stofnunin sendi ráðuneytinu í vikunni segir að um
„alvarlegar brotalamir, sem ekki verði deilt um“ hafi verið að ræða í
færslum yfirlæknisins á sjúkraskrá og reikningagerð.
Í gær var undirritaður samningur milli Vinnumálastofnunar, KVASIS, samtaka fræðslu- og símenntunarmiðstöðva og Fræðslumiðstöðvar atvinnulífsins um náms- og starfsráðgjöf fyrir atvinnuleitendur. Á vegum fræðslu- og símenntunarmiðstöðva starfa náms- og starfsráðgjafar, sem munu með þessum samningi taka þátt í að ná til atvinnuleitenda sem tryggðir eru innan atvinnuleysistryggingakerfisins og hvetja þá til virkni.
Um næstu mánaðarmót munu leikskólinn og grunnskólinn á Hallormsstað formlega sameinast. Leikskólinn Skógarsel verður þar með ein deild innan Hallormsstaðaskóla. Mikil áhersla hefur verið lögð á samstarf leik-og grunnskólans undanfarin ár og með þessum breytingum gefst tækifæri til að samtvinna nám og leik skólastiganna enn frekar.
Ríkisendurskoðun lýsti því yfir í dag að stofnunin myndi ekki aðhafast
frekar í máli Hannesar Sigmarssonar, yfirlæknis Heilbrigðisstofnunar
Austurlands (HSA) á Eskifirði. Heilbrigðisráðuneytið er hvatt til að
huga að viðeigandi úrræðum.
Skrifað var undir nýtt samkomulag um ullarviðskipti í gær. Samkvæmt því hækkar ullarverð til bænda um 8% frá og með 1. nóvember nk. Ullarverð hækkaði síðast þann 1. nóvember 2008 og frá þeim tíma hefur vísitala neysluverðs hækkað um 9,7% þannig að hækkunin nú vegur ekki upp almennar verðhækkanir.
Vísindagarðurinn stendur fyrir Vísindakaffi á Gistihúsinu Egilsstöðum á morgun, föstudag, kl. 12 til 14. Elfa Hlín Pétursdóttir, safnstjóri Minjasafns Austurlands, mun halda fyrirlestur sem nefnist Líf og störf Sigríðar Þorsteinsdóttur og Ingibjargar Skaptadóttur, - mæðgur, ritstjórar, kaupstaðabúar, Þingeyingar, Seyðfirðingar, kvenréttindakonur, bindindisfrömuðir...
Rjúpnaveiðitímabilið hefst á morgun. Það stendur í 18 daga og er síðasti veiðidagur 6. desember. Veiða má frá föstudegi til sunnudags þennan tíma. Búist er við fjölda rjúpnaskytta til Austurlands á veiðar um helgina, því veðurspá er sýnu best á því svæði. Heimamenn eru líka að gera sig klára. Nú orðið er unnt að kaupa veiðileyfi á netinu kjósi menn slíkt. Þá eru veiðileiðsögumenn að fara með útlendinga á rjúpu á Austurlandi. Slysavarnarfélagið Landsbjörg hvetur rjúpnaveiðimenn til að sýna aðgát.
Undanfarnar vikur hefur verið unnið við að byggja upp nýtt tjaldstæði á Egilsstöðum, á reit þar sem fyrirtækið Barri var áður með aðstöðu. Tjaldstæði sunnan við Samkaup, sem verið hefur í notkun undanfarin ár, þarf að víkja vegna miðbæjarskipulags sem tók gildi fyrir nokkrum misserum, auk þess sem það uppfyllir ekki lengur kröfur samtímans.
Undanfarnar vikur hafa nemendur í 8. bekk Seyðisfjarðarskóla verið að undirbúa sig fyrir hina árlegu First Lego League keppni. Keppnin verður haldin á Suðurnesjum laugardaginn 7. nóvember næstkomandi. Einn liður í undirbúningnum fyrir þessa keppni er að nemendur halda kynningu á verkefninu í heimabyggð sinni. Kynningin verður haldin í Gamla skóla, þriðjudaginn 3. nóvember klukkan 18.00. Aðgangseyrir er aðeins 600 krónur, allur ágóði er fjáröflun fyrir ferðina.