Blátt áfram, félagasamtök um forvarnir gegn kynferðislegu ofbeldi á börnum, hafa gefið út barnabókina ,,Þetta eru mínir einkastaðir“ í samvinnu við Hagkaup. Sérfræðingar áætla að ein af hverjum fjórum stúlkum og einn af hverjum sex drengjum séu misnotuð kynferðislega áður en þau halda upp á 18 ára afmælið sitt. Þetta þýðir að í öllum kennslustofum og hverfum eru börn sem þjást í hljóði vegna kynferðislegrar misnotkunar. Tilgangur samtakanna Blátt áfram er að efla forvarnir gegn kynferðislegu ofbeldi á börnum á Íslandi.
Heildarafli íslenskra skipa nam 108.612 tonnum tonnum í mars, sem er verulegur aflasamdráttur frá sama mánuði í fyrra er aflinn var 169.690 tonn. Þar vegur þyngst að engin loðnuveiði var í mars en botnfiskafli var hins vegar tæplega 10% meiri en í mars 2008.
Sameina á atvinnulífstengda sjóði Fljótsdalshéraðs, Atvinnumálasjóð og Fjárafl, í einn atvinnutengdan sjóð. Bæjarráð Fljótsdalshéraðs samþykkti tillögu þar að lútandi á fundi sínum 8. apríl. Hún kemur upphaflega frá stjórn Fjárafls. Er stefnt að því að sjóðirnir verði sameinaðir á aðalfundi Fjárafls 30. apríl. Gert er ráð fyrir að atvinnumálanefnd sveitarfélagsins fari með stjórn hins nýja sameinaða sjóðs og stefnt að því að hann taki til starfa frá og með 1. október næstkomandi.
Framkvæmdir við nýtt hjúkrunarheimili á Eskifirði, sem lengi hafa verið í undirbúningi, hefjast nú í sumar. Hjúkrunarheimilið rís á lóðinni Dalbraut 1 en samningar hafa tekist við Samkaup um að bærinn leysi lóðina og mannvirki á henni til sín. Gert er ráð fyrir að byggð verði 20 ný hjúkrunarrými og komi þau í stað núverandi Hulduhlíðar. Almenn hjúkrunarrými verða 10 og 8 hjúkrunarrými og 2 hvíldarrými verða fyrir heilabilaða. Hjúkrunarheimili eru byggð á kostnað og ábyrgð ríkisins að 85%
en 15% kostnaðar greiðir sveitarfélagið. Rekstrarkostnaður greiðist úr ríkissjóði. Gott samstarf hefur verið við félags- og tryggingamálaráðuneytið um lóðamálin en sveitarfélagið leggur til lóð án gatnagerðargjalda.
Bæjarráð Fljótsdalshéraðs hefur samþykkt að ganga að tilboði Íslandsbanka í fjármögnun framkvæmda við endurbætur og nýbyggingu Grunnskólans á Egilsstöðum. Náðst hafa fram hagstæðari lánskjör en útlit var fyrir í lok mars. Því er útlit fyrir að fjármögnun byggingu skólans sé tryggð enda eru framkvæmdir þar í fullum gangi.
Tilkynnt var á dögunum um úrslit í teiknisamkeppni 9. alþjóðlega skólamjólkurdagsins. Markaðsnefnd mjólkuriðnaðarins stendur fyrir samkeppninni hér á landi. Tæplega 900 teikningar bárust frá 54 skólum í landinu. Tíu nemendur hlutu viðurkenningu og meðal þeirra er Hafþór Ingólfsson í 4. bekk Nesskóla í Neskaupstað.
Kirkju- og menningarmiðstöðin Fjarðabyggð stendur fyrir flutningi á meistarstykkinu Carmina Burana, sem hefur löngum fyllt tónleikahús hvar sem er í veröldinni. Carmina Burana er safn miðaldakvæða sem austurríska tónskáldið Carl Orff tónsetti og er sungið um fallvaltleika gæfunnar, sem á ekki síst við okkar tíma í dag en einnig um ástir og fegurð, glaum og gleði á afar litríkan hátt.