Lífið endurmetið
Sæmundur Þór Sigurðsson vann það afrek á dögunum að ganga á hæsta fjall veraldar utan Himalaya, tind Aconcagua í Andesfjöllunum í Argentínu, skammt frá landamærum Chile.
Atvinnuleitarmiðstöð opnuð í Fjarðabyggð
Í gær var staðfest samkomulag um rekstur miðstöðvar fólks í atvinnuleit í Fjarðabyggð. Hún verður til húsa að Búðareyri 1 á Reyðarfirði, en einnig verður þjónustu við atvinnuleitendur sinnt í starfsstöðvum AFLs og Þekkingarnets Austurlands víðar í Fjarðabyggð. Þegar er búið að ráða starfsmann til miðstöðvarinnar og er það Guðrún Sælín Sigurjónsdóttir. 475 eru nú skráðir atvinnulausir á Austurlandi, 295 karlar og 180 konur.
HÍ opinn stúdentum í sumar
Háskóli Íslands hefur ákveðið að gefa stúdentum kost á að nýta aðstöðu í Háskólanum í sumar til að vinna að námi sínu. Einnig er verið að kanna möguleika á að bjóða upp á valin námskeið og að halda skrifleg próf í ágúst. Í þessu sambandi er í mörg horn að líta, s.s. varðandi kostnað, námskeiðaval, gæðakröfur og skipulag og umsýslu. Stórfellt atvinnuleysi stúdenta í sumar er fyrirsjáanlegt. Í tilkynningu frá skólananum segir að hann hafi að markmiði að vinna með stúdentum og stjórnvöldum að því að finna leiðir til að auka þjónustu við stúdenta í sumar eins og nokkur er kostur.
Hrapalleg mistök í Gettu betur
Davíð Þór Jónssyni, tengdasyni Fljótsdalshéraðs og dómara í Gettu betur, urðu á hrapalleg mistök í úrslitakeppninni í kvöld.
Ný fatabúð á Stöðvarfirði
Stöðvarfjarðardeild Rauða kross Íslands opnar í dag verslun með notuðum og nýjum fatnaði. Verður hún til húsa hjá deildinni að Fjarðarbraut 48, Heimalundi, á móti gömlu símstöðinni á Stöðvarfirði. Þóra Björk Nikulásdóttir er formaður Stöðvarfjarðardeildar RKI.
HK Íslandsmeistarar í blaki
HK tryggði sér Íslandsmeistaratitilinn í gærkvöld með því að leggja lið Þróttar Nes í Neskaupstað 0-3 (21-25,12-25,14-25). Lið HK átti afbragðsgóðan leik og gaf engin færi á sér. Fyrsta hrinan var jöfn en heimastúkur náðu ekki að halda kraftinum út alla hrinuna og endaði hún 21-25. Síðari tvær hrinurnar voru nokkuð keimlíkar. HK náði miklu forskoti strax í upphafi í báðum hrinum og náði m.a 7 stigum á móti 0 í annari hrinu, eftir það varð ekki við neitt ráðið og virtust þær ekki finna taktinn aftur þrátt fyrir gríðarlegan stuðning áhorfenda sem fylltu íþróttahúsið.
VG opnar kosningaskrifstofu
Vinstri græn opna formlega kosningaskrifstofu flokksins í Kaupvangi 5 á Egilsstöðum í dag. Í tilkynningu frá flokknum segir að frambjóðendur verði á staðnum og boðið verður upp á tónlistaratriði. Skrifstofan opnar kl. 16.
Fullveldissinnar draga framboð til baka
L – listi fullveldissinna mun ekki bjóða fram í komandi Alþingiskosningum og hefur dregið framboð sitt til baka, að sögn vegna ólýðræðislegra aðstæðna. Ákvörðun um þetta var tekin á fundi sem haldinn var í Hafnarfirði í gær. Hreyfingin mun áfram starfa sem frjáls framboðs- og sjálfstæðishreyfing.
Húsaleigubætur farnar að berast
Sveitarfélagið Fjarðabyggð er aftur farið að greiða út húsaleigubætur eftir tveggja mánaða bið.
