Annir í Listasmiðju Norðfjarðar
Mikið er um að vera hjá Listasmiðju Norðfjarðar þessa dagana og hafa þær konur sem standa fyrir félaginu verið að fá góða styrki sem eflt hafa starfsemi smiðjunnar.
Sameiningarviðræður hefjist
Bæjarráð Fljótsdalshéraðs vill að hafinn verði undirbúningur að formlegum viðræðum við Djúpavogshrepp um hugsanlega sameiningu Fljótsdalshéraðs og Djúpavogshrepps, en málið hefur verið til umfjöllunar síðustu misseri.
Íþróttabrölt á Stöðvarfirði
Nú eru nemendur í 7. til 10. bekk grunnskóla Fjarðabyggðar önnum kafnir á sameiginlegri íþróttahátíð á Stöðvarfirði. Keppt er í óhefðbundnum íþróttagreinum af ýmsu tagi og á að enda hátíðina á flatbökuveislu nú í hádeginu. Keppni hófst snemma í morgun og stefnt á að allir verði komnir til síns heima um klukkan tvö í dag.
Nýir eigendur að Hótel Bláfelli
Hótel Bláfell á Breiðdalsvík hefur verið selt. Kaupendur er hjón á besta aldri sem verið hafa við nám í Danmörku, en munu flytja til Breiðdalsvíkur ásamt börnum sínum í endaðan mars.
Kristín Ársælsdóttir og Njáll Torfason hafa rekið hótelið síðastliðin tíu ár. Kristín segir söluna frágengna, en að hinir nýju eigendur taki ekki við staðnum fyrr en í enda mars og hótelið verði lokað um óákveðinn tíma. Kaupverð fæst ekki uppgefið.
Ingunn tekur við Menningarmiðstöð Fljótsdalshéraðs
Ingunn Anna Þráinsdóttir hefur verið ráðin sem framkvæmdastjóri Menningarmiðstöðvar Fljótsdalshéraðs frá 1. febrúar. 11 umsækjendur voru um starfið. Ingunn er frá Egilsstöðum, er grafískur hönnuður og listamaður og hefur starfað hjá Héraðsprenti. Hún hefur gjarnan farið ótroðnar slóðir í verkum sínum og getið sér góðs orðs fyrir frumlega íslenska hönnun.
Jóna Guðlaug kjörin íþróttamaður Þróttar
Jóna Guðlaug Vigfúsdóttir var valin íþróttamaður Þróttar fyrir árið 2008 í vikunni. Hún átti frábært tímabili 2007-2008 með blakdeild Þróttar Neskaupstað en þær unnu þrefalt; urðu deildar-, bikar- og Íslandsmeistarar kvenna.
Nýr vettvangur fyrir atvinnulausa
Í vikunni hefst á Egilsstöðum samstarfsverkefnið Fólk í atvinnuleit og á það að vera sameiginlegur vettvangur fyrir atvinnulausa. Verður hann í húsnæði svokallaðrar Níu í miðbænum og þar boðið upp á ýmsilegt námskeiðahald og samræðu. Að verkefninu standa Vinnumálastofnun, Fljótsdalshérað, Þekkingarnet Austurlands, Austurnet og AFL Starfsgreinafélag. Í dag eru 375 manns án atvinnu á Austurlandi; 143 konur og 232 karlar. 13.280 eru atvinnulausir á landinu öllu.Nýr forstöðumaður Vegahúss
Nýr forstöðumaður tekur við Vegahúsinu, ungmennahúsi á Egilsstöðum, á morgun 1. febrúar. Þá tekur Halldór B. Warén við af Kristínu Scheving sem verið hefur forstöðumaður undanfarin ár. Þrettán umsækjendur voru um starfið.
Halldór er frá Egilsstöðum, menntaður rafeindavirki og hefur getið sér góðs orðs sem tónlistarmaður og upptökustjóri. Undanfarið hefur hann starfað við útsendingar Svæðisútvarps Austurlands. Kristín er flutt af staðnum en mun árlega koma til að fylgja kvikmynda- og myndbandahátíðinni 700IS Hreindýraland eftir.
Helga Jónsdóttir orðuð við ríkisstjórn
Í DV í dag kemur fram að hjá Samfylkingunni hafi í gær komið upp nafn Helgu Jónsdóttur, bæjarstýru í Fjarðabyggð, í tengslum við stjórnarmyndun og ráðherrastóla.
Þegar þetta var borið undir Helgu í dag, sagðist hún ekkert hafa heyrt um þetta og kæmi sér á óvart ef rétt reyndist. Hún væri enda bundin sínu starfi sem bæjarstýra og væri ekki á förum úr því embætti.
