Fiskeldi HB Granda í Berufirði fékk nýverið 27 þúsund þorskseiði frá Stofnfiski sem komið var fyrir í eldiskvíum í firðinum. Þetta var annar seiðaskammturinn í sumar því í júní voru sett út 23 þúsund seiði. Tíu þúsund þorskar voru fyrir í eldi þannig að um sextíu þúsund fiskar eru alls í stöðinni. Fiskurinn sem er í eldiskvíunum verður væntanlega ekki kominn í sláturstærð fyrr en í lok næsta árs, að því er fram kemur á heimasíðu HB Granda.
Makríll fannst allt vestur að Kolbeinsey í leiðangri sem Hoffellið SU, skip Loðnuvinnslunnar, fór fyrir Hafrannsóknarstofnun.
Framkvæmdum við nýja fiskmjölsverksmiðju HB Granda á Vopnafirði miðar vel. Á vef HB Granda segir að þær séu á áætlun. Um helgina átti að steypa verksmiðjugólfið en það tafðist fyrir helgi vegna veðurs. Fyrstu bílarnir sem flytja strálgrindina í verksmiðjuhúsið komu til Vopnafjarðar í lok vikunnar.
Listaverkið Hringiða eftir Jónínu Guðnadóttur var afhjúpað við Kárahnjúka í seinustu viku. Listaverkið er umhverfislistaverk sem myndar eins konar útsýnispall yfir Kárahnjúkastíflu.
Jóna Kristín Þorvaldsdóttir, bæjarstjóri í Grindavík, verður væntanlega næsti sóknarprestur í Kolfreyjustaðarprestakalli.
Um síðastliðna helgi fór fram hátíðin The British Birdwatching Fair eða Birdfair við Rutland Water í Northamptonskíri á Englandi. Hátíðin er þekkt sem nokkurs konar Glastonbury hátíð fuglaskoðara en fólk streymir að hvaðanæva úr heiminum til að taka þátt. Íslensku þátttakendurnir á sýningunni voru Birds.is á Djúpavogi, Gavia Travel, Isafold Travel, Vestfjarðaklasinn, Hótel Brimnes og Atvinnuþróunarfélag Norður-Þingeyjasýslu.
Arnbjörg Sveinsdóttir, Seyðfirðingur og fyrrum þingmaður Sjálfstæðisflokksins í Norðausturkjördæmi, er meðal tólf umsækjenda um embætti fiskistofustjóra. Umsóknarfrestur rann út á fimmtudag í síðustu viku. Tveir aðrir fyrrverandi þingmenn eru meðal umsækjenda. Sjávarútvegsráðherra skipar í stöðuna frá og með 1. september n.k.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.