Rákust saman í þoku
Skip Síldarvinnslunar í Neskaupstað, Birtingur og Súla, rákust saman í svartaþoku á miðunum austan af landinu í vikunni. Súlan skemmdist talsvert, en verið er að meta þær. Engin slys urðu á mönnum.
Nýtt nótaverkstæði á Eskifirði
Egersund á Íslandi hefur opnað nýtt nótaverkstæði á Eskifirði. Byggingaframkvæmdir hafa tekið tíu mánuði . Fyrirtækið verður með netaverkstæði og veiðarfæraframleiðslu. Einnig verður hægt að hýsa veiðarfæri við góðar aðstæður. Fljótlega verður byrjað að framleiða þann hluta veiðarfæra sem áður þurfti að fá frá móðurfyrirtækinu í Noregi. Forsvarsmenn fyrirtækisins segja að þegar starfsemin verði komin á skrið muni stöðugildum hjá Egersund fjölga, en nú starfa tólf manns hjá fyrirtækinu á Eskifirði.
Annar látinn og hinn mikið slasaður
Annar tveggja manna um borð í einkaflugvélinni sem brotlenti á Vopnafirði í dag lést í slysinu. Hinn var fluttur með sjúkraflugi til Reykjavíkur mikið slasaður. Rannsóknarnefnd flugslysa og lögregla í umdæmi sýslumannsins á Eskifirði fara með rannsókn málsins.
Gatnagerð í þéttbýli Fjarðabyggðar
Nú standa yfir endurbætur á þjóðvegum í þéttbýli á Eskifirði, Neskaupstað og Reyðarfirði. Eru það einkum malbiksframkvæmdir og stærsti þáttur þeirra á þjóðbrautinni gegnum Neskaupstað. Er þar um að ræða vegkafla frá gamla frystihúsinu að Mána og frá Netagerðinni að Olís. Einnig er verið að lagfæra skemmdir vegna framkvæmda á vegum RARIK og Mílu,í götum og á gangstéttum.
Kátir dagar á Þórshöfn
Undirbúningur Kátra daga á Þórshöfn er nú í algleymingi. Meðal skemmtilegra dagskrárliða hátíðarinnar má nefna hagyrðingakvöld 17. júlí í Þórsveri. Þar leiða saman hesta sína þeir Jóhannes Sigfússon á Gunnarsstöðum, Pétur Pétursson á Akureyri, Jónas Friðrik Guðnason á Raufarhöfn og Árni Jónsson á Fremstafelli. Stjórnandi verður Birgir Sveinbjörnsson. Þá verður opnuð sýning tileinkuð lífi Drauma-Jóa í Sauðaneshúsi og flutt dagskrá af sama tilefni í Sauðaneskirkju 16. júlí.
Drauma-Jóa sýningin mun standa uppi í sumar í Sauðaneshúsi, en þar er opið alla daga frá kl. 11:00 - 17:00.
Flugslys í Vopnafirði
Lítil fjögurra manna Cessna flugvél brotlenti kl. rúmlega fjögur í dag nálægt Selá í Vopnafirði, um 13 km frá þéttbýlinu. Tveir voru um borð í vélinni. Björgunarsveitin Vopni og Slökkvilið Vopnafjarðar voru kölluð á staðinn, lögregla fór einnig frá Egilsstöðum á vettvang og þyrla Landhelgisgæslunnar var sett í viðbragðsstöðu en var ekki send af stað. Sjúkraflugvél frá Akureyri flaug á Vopnafjörð. Engar upplýsingar liggja fyrir um afdrif þeirra sem í vélinni voru.
800 tonn af færiböndum urðuð
Umhverfisstofnun hefur gefið leyfi til að um 800 tonn af færiböndum úr aðrennslisgöngum Kárahnjúkavirkjunar verði urðuð. Impregilo notaði tugkílómetra löng færiböndin til að flytja grjót frá Robbins borunum sem notaðir voru til að heilbora megnið af gangakerfi virkjunarinnar. Á að urða færiböndin, sem tekur minnst fjörtíu stóra bíla til að flytja, á urðunarstað Fljótsdalshéraðs að Tjarnarlandi.
Maður féll niður í lest á skipi
Maður féll ofan í lest á Bjarna Ólafssyni AK í Neskaupstað um hálfsjöleytið í morgun. Verið var að landa úr skipinu og missti maðurinn meðvitund er hann var á leið upp úr lestinni. Hann féll aftur fyrir sig ofan í lestina. Menn sem unnu á staðnum höfðu snarar hendur og náðu honum upp. Hann hlaut minni háttar áverka á höfði og komst fljótt til meðvitundar. Líklegt þykir að liðið hafi yfir manninn vegna loftleysis í lestinni. Lögreglan á Eskifirði rannsakar málið.
Fíflarækt í Bleiksárhlíð
Kona hafði samband við Austurgluggann í gærdag og vildi koma á framfæri undrun sinni yfir hversu Bleiksárhlíðin á Eskifirði væri seint slegin af bæjarstarfsmönnum, en hálfnað var að slá hana í gær. ,,Þeir passa sig á að fíflarnir séu farnir að gefa frá sér fræ, svo við höfum eitthvað að gera í görðunum okkar í sumar hér í Bleiksárhlíðinni," sagði hún og bætti við að starfsmennirnir sem væru við slátt sæju til þess að það af fræjunum sem ekki hefði þegar fokið í garða íbúa, feyktist þangað núna. ,,Væri ekki ráð að skipuleggja bæjarvinnuna aðeins betur? Í stað þess að hafa ungmennin hangandi yfir sömu blómabeðunum dagana langa mætti skipta þeim niður og hefja slátt í hlíðinni mun fyrr en gert hefur verið til þessa," sagði konan og býr sig undir að sleppa ferðalögum og stinga þess í stað upp fífla í garðinum hjá sér í allt sumar.
